Materi Biantara 6

 G. MÉTODE BIANTARA

Teu saeutik jalma nu rampang-reumpeung upama dibéré pancén nyarita atawa biantara di hareupeun jalma réa. Bingung, naon anu kudu dicaritakeunana. Métode nyarita ngawengku: (1) métode impromtu, (2) métode naskah/manuskrip, (3) métode ékstémporan, jeung (4) métode ngapalkeun/memoritér.

• 1. Métode Impromtu

Ieu métode biasana dipaké ku panyatur anu dina nepikeun biantarana teu tatahar heula saméméhna. Panyatur teu boga rencana pikeun nyarita ti anggalna. Pikeun jalma anu teu biasa nyarita di hareupeun jalma réa sok gugup ngagunakeun métode saperti kieu téh. Naon-naon anu rék dicaritaeun ngadadak laleungitan, awak ngadégdég, napas ogé ngadadak karasa eungap, jeung jajantung ratug sarta ka luar késang badag jeung késang tiis. Tapi sabalikna, tumerapna ka jalma nu bisa nyarita mah teu gedé teuing réaksi kitu téh, lantaran geus loba pangalaman nyarita di hareupeun jalma réa.

• 2. Métode Naskah

Panyatur dina nyaritana téh bari maca naskah. Saméméhna panyatur tatahar heula nyayagikeun naskah, nyaéta ku cara maluruh jeung ngumpulkeun bahan picaritaeun salengkep-lengkepna. Sajaba ti éta, panyatur geus dibéré iber saha nu baris jadi audience-na, jeung deui bisa latihan heula ku cara maca sababaraha balikan éta naskah nu disayagikeun téa. Ieu métode téh aya onjoyna ti nu kahiji, nyaéta bahan picaritaeun téh ngaguluyur, lengkep, sarta informasi nu katarima ku paregep ogé baris leuwih jelas. Ngan kahéngkéranana panyatur sok tonggoy kana téks bacaan, tampolana pamiarsa mah tara katalingakeun. Kurang-kurangna pangalaman ieu métode téh sok matak ngabosenkeun pamiarsa. Ku lantaran kitu, weruh tanda baca, lentong, jeung luhur handapna sora salila maca naskah kudu diperhatikeun.

• 3. Métode Ngapalkeun

Saméméh biantara, panyatur ngapalkeun heula bahan picaritaeun anu geus disusunna. Nyarita samodél kieu biasaana sok dipaké ku para siswa nu keur dialajar biantara, diajar déklamasi atawa diajar ngadongéng. Kahéngkéran ieu métode nyaéta panyatur sakapeung mah sok tara kebat nyaritana téh, lantaran nginget-nginget bahan picaritaeun anu diapalkeunana. Lantaran konséntrasi payatur museur kana bahan caritaan anu keur diinget-ingetna sajeroning nyarita, atuh pamiarsa atawa audién-na ogé teu katalingakeun kalawan gembleng.

• 4. Métode Ékstémporan

Ieu métode magrupa campuran tina dua métode di luhur. Dina prak- prakkanana panyatur geus mibanda bahan anu gembleng jeung mérélé, da puguh geus tatahar saméméhna. Ngan dina prungna nyarita atawa biantara téh, éta panyatur bari jeung dibarengan ku saliwat-saliwat maca naskah. Éta ogé nu dicatetna teu sagemblengna, tapi ngan gurat badagna waé. Kaunggulan ieu métode ti nu kadua di antarana waé panyatur bisa ngabagi paningal ka pamiarsa, sarta aya kontak paningal jeung pamiarsa.

Latihan Soal 1 & Kunci Jawaban

1. Naon ari biantara téh?
2. Sebutkeun struktur biantara!
3. Sebutkeun padika biantara!
4. Kumaha cara nyusun téks biantara?
5. Jéntrékeun cara midang biantara!
6. Jéntrékeun métode naon waé anu digunakeun dina biantara!